रचनात्मक कार्य गर्दै ताप्लेजुङमा तरुण दलले मनायो स्थापना दिवस

रेडियो ताप्लेजुङ

कार्तिक १० गते । नेपाल तरुण दलको ७३औँ स्थापना दिवसको अवसरमा जिल्ला कार्यसमिति ताप्लेजुङले जिल्ला अस्पतालका बिरामीहरूलाई फलफूल वितरण गरेको छ।

सामाजिक उत्तरदायित्व बहन गर्दै अस्पतालमा उपचाररत बिरामीहरूको शीघ्र स्वास्थ्यलाभको कामनासहित फलफूल वितरण कार्यक्रम आयोजना गरिएको हो।

जिल्ला कार्यसमितिका कार्यवाहक सभापति पृथ्वीमान पालुङ्गाको नेतृत्वमा गएको नेता तथा कार्यकर्ताहरूको टोलीले अस्पतालमा उपचाररत बिरामीहरूको शय्यामा पुगेर उनीहरूको स्वास्थ्य अवस्थाबारे जानकारी लिनुका साथै फलफूल वितरण गरेको थियो।

कार्यक्रममा जिल्ला कार्यसमितिका सचिव डम्बर हाङ्गाम, फुङ्लिङ नगर सभापति विनोद गुरुङ, महाधिवेशन प्रतिनिधि शिला इजमलगायत तरुण दलका नेता तथा कार्यकर्ताहरूको उपस्थिति रहेको थियो।

नेपाल तरुण दलले विभिन्न रचनात्मक तथा सामाजिक कार्य गर्दै स्थापना दिवस मनाउने क्रममा यस वर्ष अस्पतालका बिरामीहरूलाई फलफूल वितरण गरिएको आयोजकले जनाएको छ। कार्यक्रममा तरुण दलका नेताहरूले बिरामीहरूको शीघ्र स्वास्थ्यलाभको कामनासमेत गरेका थिए।

सूचना : यस रेडियो ताप्लेजुङको वेबसाइटमा प्रकाशित समाचार कुनै पनि छापा वा डिजिटल माध्यममा बिना अनुमति कपी गरी प्रकाशन वा प्रसारण नगरिदिनुहोला। स्पष्ट स्रोत नखुलाएमा विद्युतीय ऐन अन्तर्गत भइ जाने व्यहोरा जानकारी गराइन्छ ।